Дабрачынная каталіцкая місія Карытас Віцебскай дыяцэзіі арганізавала збор сродкаў на працягу Вялікага посту для пакупкі каляскі Крысціне, у якой - ДЦП. На заклік Карытас адгукнулася 30 парафій дыяцэзіі. Дзеці і дарослыя з каталіцкіх парафій Віцебшчыны складалі ахвяраванні на гэтую дабрачынную мэту. Нарэшце, гэты дзень настаў, калі Крысціна змагла самастойна, без дапамогі іншых, выехаць на вуліцу на гэтай электракалясцы.

Вытворца каляскі – фірма Ortonica. Каляска спрактавана такім чынам, каб яна магла быць надзвычай зручнай для чалавека, у якога ДЦП. Яна ўльтралёгкая і складная. Такім чынам, яе лёгка можна скласці ў багажнік аўтамабіля.

Крысціна Бароўка і яе бацькі выказваюць шчырую ўдзячнасць усім, хто збіраў сродкі на пакупку гэтай каляскі. Да гэтых выказванняў удзячнасці далучаюцца і супрацоўнікі Віцебскага Карытас. “Акцыя “Дар сэрца”, якую мы праводзілі ў Вялікім посце, паказала, як шмат у Віцебскай дыяцэзіі неабыякавых людзей. Вельмі прыемна бачыць, што вернікі ў нашых парафіях так шчыра адгукнуліся на наш заклік і дапамаглі Крысціне займець гэты неабходны для яе транспартны сродак”, - сказаў кс. Віктар Місевіч, дырэктар Віцебскага Карытас.

 Сродкі, якія засталіся пасля пакупкі каляскі Ortonica, Віцебскі Карытас выкарыстоўвае, каб дапамагаць найбольш уразлівым групам людзей. Гэта – інваліды, шматдзетныя сем’і і людзі, якія апынуліся ў надзвычай складаным фінансавым становішчы.

Лаліта Арлоўская