Каритас

   У верасні гэтага года для дзяцей прыходу Езуса Міласэрнага ў горадзе Паставы была арганізавана экскурсія ў парк-музей інтэрактыўнай гісторыі Сула, у Замкавы комплекс "Мір" і на зваротным шляху ў Навагрудак - на Радзіму Адама Міцкевіча і пакутніц сясцёр Назарэтанак.

   Экскурсія выдалася на славу! Парк-музей Сула - выдатнае і цікавае месца для адпачынку. Экскурсія пачалася з коннага эскорту пад жывую музыку. Экскурсавод Павел у адзенні тых часоў прапанаваў нам акунуцца ў гісторыю Беларусі. Мы наведалі залу-музей шляхецкай славы "Каралеўская Асамблея", сярэднявечны квартал "Млын", "Ганчарню", "Кузню", дзе дзеці самі змаглі прыняць удзел у стварэнні вырабаў з гліны, наканечнікаў для стрэл, спрабавалі раскалоць валун з палявога граніту. Таксама наведалі тэматычную пляцоўку язычніцкай культуры, дзе пачулі, як бачылі навакольны свет нашы далёкія продкі. Дзеці змаглі пакатацца па рацэ на драккары.

   Далей наш шлях ішоў у г.п. Мір, дзе мы наведалі Замкавы комплекс "Мір". Пазнаёміліся з яго ўладальнікамі і акунуліся ў гісторыю замка. Нас суправаджалі выдатныя экскурсаводы . Мы наведалі раскошныя залы, дзе праводзіліся балі, таксама залу, дзе трапезнічалі госці, бібліятэку, апачывальню. Падняліся на верх вежы, наведваючы кожны паверх з экспанатамі, спусціліся ў падвальныя памяшканні, дзе захоўваліся запасы прадуктаў, выраблялі і захоўвалі віно. Наведалі памяшканне, дзе елі слугі і памяшканне, дзе слугі адбывалі пакаранне. Пабывалі ў капліцы-пахавальні.

   А яшчэ мы наведалі Мікалаеўскі касцёл, які быў зачынены з 1942 года па 2008 год. Пачулі цікавую гісторыю касцёла ад парафіянкі Марыі Вікенцьеўны. І на гэтым бы наша экскурсія падышла б да канца, але так, як наш зваротны шлях ішоў праз Навагрудак, мы змаглі пабываць на Замкавай гары і паглядзець помнік Адама Міцкевіча. Выдатна прайшоў час, паездка застанецца на доўга ў памяці дзяцей і дарослых! 

Вялікі дзякуй спонсарам, ксяндзу Андрэю і настаўнікам за дапамогу!