У гонар Міжнароднага дня валанцёра ў Віцебску прайшоў ІІІ абласны злёт валанцёраў "сярэбранага" ўзросту, паведамляе vitbichi.by. Удзельнікі з Віцебскай вобласці з'ехаліся ў Лядовы палац. Там можна было агледзець цудоўныя выставы вырабаў, зробленыя рукамі валанцёраў і іх падапечных, пачуць у іх выкананні песні і ігру на музычных інструментах, убачыць танцавальныя нумары. Гучалі смех і музыка, свяціліся запалам вочы.

Як належыць мерапрыемству такога маштабу, не абышлося без узнагароджання лепшых валанцёраў за іх бескарыслівую працу. Падзякі ў намінацыі "За духоўна-патрыятычную дзейнасць" валанцёрам уручалі дырэктар дабрачыннага каталіцкага таварыства "Карытас" Віцебскай дыяцэзіі ксёндз канонік Віктар Місевіч і прадстаўнік Віцебскай епархіі Беларускай праваслаўнай царквы протаіерэй Аляксандр Лесавы.

Віцебшчына не проста лідзіруе сярод іншых абласцей па колькасці валанцёраў пры тэрытарыяльных цэнтрах сацыяльнага абслугоўвання насельніцтва, але і па колькасці валанцёраў-мужчын. Зрэшты, не гэта галоўнае - усе "сярэбраныя" валанцёры, незалежна ад полу, спяшаюцца рабіць дабро і дарыць радасць.

Крысціна Дулебава, фота