З 11 студзеня ў касцёле св. Юзафа ў Оршы дзейнічае фотавыстава "Мои года - моё богатство!", арганізаваная Дабрачыннай каталіцкай рэлігійнай місіяй Карытас Віцебскай дыяцэзіі.

Мэтай выставы з'яўляецца інфармаванне людзей аб праблеме дэменцыі, фарміраванне добразычлівага стаўлення грамадства да людзей з дэменцыяй і знаёмства са спосабамі яе прафілактыцы.

Падчас прэзентацыі прысутныя даведаліся пра дзейнасць Карытас Віцебск у напрамку падтрымкі людзей з дэменцыяй і родных, якія за імі даглядаюць. Таксама яны пазнаёміліся з гісторыямі двух прадстаўленых на фота жанчын.

Фотавыстава будзе дзейнічаць у касцёле св. Юзафа да 18 студзеня.

Фатаграфіі былі прадстаўлены Рэсурсным цэнтрам пры Карытас Віцебск і фатографкай Настай Швед.