30 мая ў цёплай і ўтульнай канферэнц-зале касцёла Езуса Міласэрнага прайшоў сапраўды святочны дзень для асаблівых людзей. Фестываль «Фарбы жыцця», падрыхтаваны Релігійнай арганізацыяй «Дабрачынная каталіцкая місія Карытас Віцебскай дыяцэзіі» стаў для людзей з інваліднасцю месцам святкавання дару жыцця і талентаў, атрыманых ад Бога.

У гэтым годзе ў фестывалі прынялі ўдзел 22 чалавекі з інваліднасцю. Большасць з іх — удзельнікі клуба «Бэтэль».

Незвычайны гадзіннік, выкананы з дрэва на прафесійным узроўні, на фестываль даслала Хахлова Вольга. Яна знаходзіцца ў Сялюцкім сацыяльным пансіянаце, таму не змагла прыехаць сама. Замест Вольгі на фестывалі прысутнічаў супрацоўнік пансіянату ў Сялютах, які перадаў ад удзельніцы падзяку за запрашэнне і невялікія сувеніры для арганізатараў.

Удзельнікі «Фарбаў жыцця» — сапраўдныя таленты, людзі з вялікім сэрцам і разнастайнымі здольнасцямі. Іх творчасць была падзелена на тры намінацыі: малюнак, дэкаратыўна-прыкладное мастацтва і выканальніцкае мастацтва. Работы можна было паглядзець да пачатку афіцыйнай часткі і пасля яе заканчэння.

На пачатку мерапрыемства дырэктар Карытас Віцебск — ксёндз канонік Віктар Місевіч— прамовіў цёплыя прывітальныя словы, у якіх пажадаў усім добрага настрою і адзначыў, што ўсе ўдзельнікі ўжо пераможцы, бо знайшлі ў сабе сілы паказаць свой талент.

Урачыстае адкрыццё працягнулася выступам музыкі віяланчэліста Леаніда Волкава, які споўніў кампазіцыю П’ерпаала Герыні (вольнае выкананне па матывах арыгінальнага сачынення) і імправізацыю на тэму Ханса Фларыяна Цымера.

Пасля гэтага пачаліся доўгачаканыя выступы. Пакой сапраўды напоўніўся непаўторнымі фарбамі ад таго, якім неабмежаваным можа быць творчае жыццё. Удзельнікі спявалі песні, дэкламавалі вершы, дэманстравалі танцы і гралі на музычных інструментах, а некаторыя нават прадставілі некалькі нумароў. У кожным творы быў бачны ўклад любові, смеласці і шчырасці — ніякі талент не застаўся не раскрытым.

Асаблівую атмасферу задавалі запрошаныя госці — прафесійныя музыканты і танцоры, якія дапамаглі ўдзельнікам наладзіць святочны і па-сапраўднаму творчы настрой.

Свята завяршылася ўручэннем дыпломаў і падарункаў. Пасля гэтага да прысутных зноў звярнуўся кс. Віктар місевіч, які выказаў шчырую падзяку ўсім, хто дапамагаў у арганізацыі і суправаджэнні фестывалю, асабліва — валанцёрам Карытас Віцебск і запрошаным гасцям.

Пасля афіцыйнай часткі ўсіх чакалі пачастунак і танцы.